Катлы алма бәлеше рецепты
Бу пирог «Терентьевка» яисә «Антоновка» сортлы алмалардан аеруча тәмле килеп чыга. Мин дә пирог өчен алманың нәкъ шундый сортлыларын гына сайлыйм.
Алманы тураганчы башта камырын басам (монысын алма караймасын өчен шулай эшлим).
Ярты стакан сөткә 3 аш кашыгы үсемлек мае, 1 йомырка, чеметем тоз белән шикәр комы, ярты чәй калагы камыр йомшарткыч салам да, бик үк каты итми генә камыр басам.
Аны полиэтилен капчыкка алып куям да, алма турарга керешәм. Анысын бетергәч, камырны 3 өлешкә бүләм. Башта шуның берсен духовка табасына җәеп салам да өстенә алма тезеп чыгам. Аңа мул гына итеп шикәр комы һәм бераз гына манный сибәм. Шуннан өстенә икенче кисәк камырны җәеп ябам да, тагын туралган алма тезәм. Беренче каттагы кебек үк, шикәр комы белән манный да сибәм. Аннан инде өченче кисәк камырны юка гына җәеп өстенә каплыйм. Соңыннан читләрен матур гына итеп чеметеп чыгам.
Пирогны 25-30 минутка мичкә озатам. 15 минут чамасы үтүгә, аш-су бүлмәсенә гади сүз белән язып аңлата алмаслык алма исе тарала башлый. Пирогны мичтән йөзе килә башлау белән үк алам (кемгә ничектер, минем үземә аның сүрәнрәк пешкәне ошый). Алма пирогы, гадәттә, суынгач тәмле була.
Источник
Тиз өлгерә торган төче камыр рецепты
— Чүпрәле камыр ашагач ашказаным авырта, шуңа күрә төче камырга өстенлек бирәм. Тиз өлгерә торган камыр рецепты әйтә алмассыз микән? (Фәния, Саба).
— Әлеге камырдан гөбәдия, өчпочмак, вак бәлеш һ.б. ашамлыклар әзерләргә мөмкин. Кулланылачак ингредиентларны бергә-бер, тигез күләмдә алырга кирәк. 1 стакан сөт, 1 стакан сыек май (атланмай кулланырга да була), чамасы белән тоз, шикәр комы салып, барысын бергә әйбәтләп болгатабыз, иләгән он өстәп, яхшы итеп камыр басабыз. Камыр 10-20 минут торганнан соң, аннан төрле ризыклар пешерергә була. Шуны онытмагыз: чәй содасы салырга кирәкми, ул камырны каралта.
420066, Казан, Декабристлар ур., 2нче йорт.
“ТАТМЕДИА” акционерлык җәмгыяте
+7 (843) 222-0-999 (1304)
Редакциянең электрон почтасы
Латыйпов Рәмис Нурмөхәммәт улы
Intertat © 2001 — 2020 Әлеге ресурста 16+ категорияләренә керүче мәгълүмат булырга мөмкин.
«ТАТМЕДИА» АҖ филиалы «Татар-информ» мәгълүмат агентлыгының Intertat (Интертат) республика электрон газетасы редакциясе».
Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2020 елның 17 гыйнварында бирелде. Таныклыкның номеры — ЭЛ № ФС 77 — 77652.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
«Татмедиа» республика матбугат һәм массакүләм коммуникацияләр агентлыгы ярдәме белән чыгарыла.
Источник
Мәдинә Гариповадан пироглар пешерү өчен камыр рецепты.
Һәрбер хуҗабикәнең үзенең камыр кую рецепты, үз сере бар. Мәдинә ханымның пироглары күпереп тора, үзе шундый йомшак була.
Һәрбер хуҗабикәнең үзенең камыр кую рецепты, үз сере бар. Мәдинә ханымның пироглары күпереп тора, үзе шундый йомшак була. Камыр кую өчен ул бер стакан кефир, ярты стакан көнбагыш мае, 2 аш кашыгы шикәр комы, 1 чәй калагы тулыр-тулмас тоз, бер кечкенә кап чүпрә ала. Йомшак кына камыр баскач, ярты сәгать кабартып ала да, пироглар ясый. Пирогны духовкада сүрән генә утта 1сәгать чамасы пешерә. Нәрсәсе бар инде моның диярсез. Сере менә нәрсәдә: камыр өчен барлык ингредиентлар да җылы булырга тиеш. Шуңа да камыр өчен бар катнашмаларны газ плитәсендә акрын гына җылытып алырга кирәк икән. Бу камырдан төрле пироглар пешерергә була. Әлеге рәсемнәрдә җиләк пирогы һәм кабак бәлешен күрәсез. Ул хәтта ит бәлешенә дә бер чеметем генә шикәр белән чүпрә кушып ясый икән. Бәлеш камыры искиткеч йомшак чыга. Пешереп карагыз әле, чынлап та бик тәмле. Камыры да авызда эреп кенә китә
Иң мөһим һәм кызыклы язмаларны Татмедиа Telegram-каналында укыгыз
Источник
Яратам бу алма бәлешен — сез дә пешереп карагыз!
Миңа бу рецептны сеңелем Ләйсән биргән иде, мин аны «Ләйсән пирогы» дип тә йөртәм. Чүпрәсез, җиңел камыр. Хәзер алма өлгереп килә, пешереп карагыз.
Рецепт буенча алынган ашамлыклардан нәкъ тә ике таба алма бәлеше чыга. Таба артык зур түгел, уртача.
Камыр ясау өчен 12 аш кашыгы кефир, 12 аш кашыгы сыек май, 1-2 йомырка, учлап шикәр комы, чама белән тоз, 1 бал кашыгы сода, аш серкәсендә эретелә. «Разрыхлитель» алсагыз да була.
Эчлек өчен кирәк кадәр алма алыгыз.
Камырны гадәти итеп басасыз, катнашмаларны тәртибе белән саласыз. Безне камыр басарга өйрәткәндә әби: «Әзер камыр савыттан аерылмый, кулдан тиз төшә. Басканда өскә күтәребрәк басыгыз, һава керсен, алай камыр әйбәт була», — дип өйрәтә иде. Туйларга ризык пешереп йөрде мәрхүмкәем. Камырны баскач, азрак килеп җитәр өчен калдырып, алма әзерләгез.
Юып, үзегез теләгәнчә турагыз. Турап бетергәч, камырны ике кисәккә бүлеп, уклау белән җәясез. Ул калын булмый. Үзегез чамаларсыз, табага җәйгәч, мин азрак, бер уч тирәсе манный ярмасы сибеп калдырам. Алма салгач, өстенә гөбәдиягә сипкән кебек учлап шикәр комы сибәм. Алмагыз нинди инде, анысын да чамаларсыз. Шикәр комы өстенә кашыклап май салам, ниндие бар. Алай алмасы тәмлерәк була. Ике табага да бәлешне әзерләп бетергәч, өстенә сибәргә азрак шикәр комы, он, берничә тамчы сыек май салып, ярмачыклар ясыйм.
Духовкада пешерәсез. Кискәндә үзен күтәрә алмаганрак тоелса да, суынгач, «гәүдәсе»н тота.
Источник
Төче камыр рецепты
Таба ашларын күптән инде төче камырдан әзерлим. Беренчедән, төче камырдан әзерләгән өчпочмак-бәлешләр җиңелрәк була. Аннары, чүпрә гөмбәсе организмга тупланып бара, күзәнәкләрне үтерә икән, диләр, белмәссең. Чөнки борынгы кеше чүпрә кулланмаган, колмак әчеткесе ясаган. Икенчедән, чүпрәле камыр безнең ашказаннарына ярамый, саруны кайната. Өченчедән, төче камырны әзерләве дә тизрәк.
Дөресен генә әйтәндә, камырым уңышлы килеп чыкканчы, төрлечә эксперимент ясап караганым булды. Миңа майлы да булмасын, корысы да тәмле түгел. Кетердәп тә торсын, каты да булмасын. Соңгы араларда ризыкларым уңышлы чыга, мөгаен, дөрес рецептка ирештем.
Төче камырдан пешкән ризыкларымның рецептларын сорыйлар иде инде. Ниһаять, сәгате сукты, ахрысы. Әлбәттә, мин аш-су остасы түгел, кемнәрдер миннән мең кат тәмлерәк әзерлидер, камырлары да минекеннән уңарактыр. Иң яхшы рецепт дигәнгә дәгъваламыйм, гаеп итештән булмасын.
Безнең мич зур, бер калаена унбиш өчпочмак сыя. Камырны якынча егерме бишләп өчпочмак чыгарлык итеп ясыйм. Алар бик зур өчпочмаклар түгел.
Зуррак җамаякка 1 бокал җылы сөт салам (бокал 200-220 мл чамасы), 250 г кибет каймагы өстим (15 процент майлылыкта). Кибет каймагы булмаса, сөтне ике бокал итеп алам. 1 йомырка сытам (күп йомырканы яратмый икән төче камыр), 1 чәй кашыгы тоз (тозның да тозлылыгы төрлечә була), 1 аш кашыгы тулыр-тулмас шикәр комы кушам. Онны илим. Минем кечкенә иләгем бар, онны аз-азлап кына, турыдан-туры камыр баса торган җамаякка илим. Онны салып, болгата башлаганчы, шушы он өстенә ике чеметем генә чәй содасы сибәм. Аннары барысын бергә кашык белән туглыйм. Онны гел өсти барам. Кашык белән болгатуы кыенлашкач, камырга 1-2 аш кашыгы үсемлек мае салып (каймак урынына сөт салсагыз, май чак кына күбрәк кирәк), азлап-азлап кына он куша барып, камырны кул белән басып бетерәм. Ул җамаяк төбенә дә, кулга да ябышмый башлый. Кулга ябышкан камырларны кашык кыры белән кырып төшерәм дә, камырны куна тактасына бушатып, инде бераз кунада басам. Барысына бергә унбиш минут чамасы вакыт китәдер. Төче камыр озаграк басканны ярата. Аз гына катырак булган кебек тоелса да, куркасы юк. Югары категорияле аш-су остасы Лилия Байкеева бераз катырак басарга куша, хәзерге оннарның җилемсәсе юк, бераз торгач, йомшап бетә, ди. Әйбәтләп басканнан соң, камырны кимендә 15 минутка (озаграк та ярый) бер читкә алып куеп торыгыз. Бу бик мөһим! Өсте кипмәсен өчен, калынрак тастымал белән каплагыз.
Аннары инде камырдан телим – очпочмак, телим – вак бәлеш, телим – бәрәңге тәкәсе яки зур бәлеш пешерәм. Мичкә тыкканда өстен майламыйм, майны таба төбенә генә салам. Пешеп чыккач, ризыкларның өстенә башта пергамент кәгазе, аның өстеннән тастымал каплап, парландырып алам. Дәү әни, дәмләндереп алу, дип атый иде шуны.
Ризыкка үтә нәзберек балаларым да бик яраталар шушылай пешергән таба ашларын.
Сезгә ошаса, шат булырмын. Чөнки Аллаһы Тәгалә белгәнеңне башкалар белән бүлешүне ярата.
Татар хатын-кызлары өчен кызыклы язмаларны Сөембикә Telegram-каналында укыгыз
Источник
